ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានស្នើសុំដល់អ្នកដែលទទួលផលពីកម្មវិធីសាច់ប្រាក់ជំនួយសង្គមទាំងអស់ ប្រើប្រាស់ថវិកាដែលទទួលបានដោយត្រឹមត្រូវជៀសវាងការប្រើប្រាស់ក្នុងគោលបំណងអបាយមុខផ្សេងៗដែលប៉ះពាល់ដល់ការអនុវត្តគោលនយោបាយរបស់រាជរដ្ឋាភិបាល។

ក្នុងសេចក្ដីជូនដំណឹងចុះថ្ងៃអាទិត្យ ទី២៤ ខែកក្កដា ក្រសួងសង្គមកិច្ចបានស្នើដល់អាជ្ញាធរឱ្យអប់រំ និងពិនិត្យលើភាពមិនប្រក្រតីដែលអាចកើតចេញពីការប្រើប្រាស់បណ្ណសមធម៌ដូចជាការយកបណ្ណទៅដាក់បញ្ចាំ ឬប្រើប្រាស់លុយដែលបើកបានយកទៅប្រើក្នុងគោលបំណងអបាយមុខផ្សេងៗ។

ក្នុងករណីដែលពិនិត្យរកឃើញអ្នកដែលទទួលផលប្រើប្រាស់ខុសគោលដៅ អាជ្ញាធរមូលដ្ឋានត្រូវធ្វើការអប់រំជាលាយលក្ខណ៍អក្សរ បើក្នុងករណីមិនរៀងចាលនោះទេ មេឃុំ-ចៅសង្កាត់ ត្រូវធ្វើការប្រជុំពិភាក្សាជាមួយក្រុមប្រឹក្សាក្នងុការធ្វើបច្ចុប្បន្នភាពបណ្ណក្រីក្រនោះឡើងវិញ។

គិតចាប់ពីថ្ងៃទី២៥ ខែមិថុនា ឆ្នាំ២០២០ រហូតមកដល់ថ្ងៃទី២៤ ខែកក្កដា ឆ្នាំ២០២២ រដ្ឋាភិបាលបានបើកផ្ដល់ថវិកាជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ អស់ជាង ៧៤៤លានដុល្លារអាមេរិក ដែលមានគ្រួសារដែលទទួលផលជិត ៧០ម៉ឺនគ្រួសារ និងមនុស្សទទួលបានជិត ៣លាននាក់៕